0
64

नमोबुद्धका नगरप्रमुख लामाको पहिलो निर्णयः महिला र साना उद्यमीलाई सहुलियत

१२ जेठ २०७९
भकुन्डे, काभ्रे ।

नमोबुद्ध नगरपालिकाका नवनिर्वाचित नगर प्रमुख कुनसाङ लामाले नगरपालिकाभित्रका महिला उद्यमी तथा साना उद्यमीलाई सहुलियत दिने निर्णय गर्दै आफ्नो कार्यकाल सुरु गरेका छन् ।

बुधबार पद तथा गोपनीयताको सपथ ग्रहणपछि पदभार ग्रहण गर्दै नगर प्रमुख लामाले पहिलो निर्णयको रुपमा स्थिर पुँजी पाँच लाख सम्म भएका लघु उद्यमहरुलाई नगरपालिकामा व्यवसाय दर्ता गर्दा कानुन बमोजिम लाग्ने दस्तुर वा शुल्कमा पूर्ण रुपमा छुट गर्ने निर्णय गरेका हुन् । यस्तै महिला उद्यमीको मात्र स्वामित्व रहने उद्योग दर्ता गर्दा लाग्ने दस्तुर पनि पूर्णरुपमा छुट गर्ने निर्णय लामाले गरेका छन् ।

यसैगरी जेष्ठ नागरिक वर्ग, पूर्ण अशक्त वर्ग र अति विपन्न वर्गलाई लक्षित गरी स्वास्थ्य उपचारका लागि निःशुल्क एम्बुलेन्स सेवा उपलब्ध गराउँदै सो वर्गलाई लक्षित गर्दै मासिक कार्यतालिका तयार गरी कम्तिमा महिनाको एक पटक दक्ष र विज्ञ जनशक्तिबाट घुम्ती स्वास्थ्य परिक्षण शिविर संचालनमा ल्याउने निर्णय पनि नगर प्रमुख लामाले गरेका छन् ।

यसैगरी प्रचलित कानुन बमोजिम तोकिएका निम्न आयस्तर भएका र अति विपन्न वर्गहरुको निशुल्क स्वास्थ्य विमा कार्यक्रम क्रमश संचालन गरिदै लाने, पर्ण अशक्त वर्ग, वैकिङ सेवासम्म पुग्न नसक्ने सामाजिक सुरक्षा भत्ता प्राप्त गर्ने लाभग्राहीहरुलाई भत्ता वितरण गर्ने वित्तीय संस्थाहरुसँग समन्वय र सहकार्य गरी सामाजिक सुरक्षा भत्ता वितरणको लागि स्थानीयस्तर र वडास्तरीयमा नै घुम्ती बैंकिङ सेवा उपलब्ध गराउने तथा नगरस्तरीय शैक्षिक छात्रवृत्ति कोष स्थापना गरी एक वटा एक कृषि प्राविधिक उत्पादन गर्न आवश्यक छात्रवृत्ति उपलब्ध गराउने निर्णय पनि नगर प्रमुख लामाले गरेका छन् ।

यी निर्णयलाई पहिलो कार्यपालिका बैठकबाट अनुमोदन गरी तत्काल कार्यान्वयनमा लगिने नगर प्रमुख लामाले बताए ।

यसअघि नगर प्रमुख लामाले काभ्रेका मुख्य निर्वाचन अधिकृत मोहनराज भट्टराईसँग जिल्ला अदालत धुलिखेलमा आयोजित कार्यक्रममा पद तथा गोपनीयताको सपथ ग्रहण गरेका थिए । त्यसलगत्तै नमोबुद्ध नगरपालिकामा भएको कार्यक्रममा नगर प्रमुख लामाले नवनिर्वाचित उपप्रमुख रत्न लामा, ११ वटै वडाका वडाअध्यक्ष एवं वडा सदस्यहरुलाई पद तथा गोपनीयताको सपथ गराएका थिए ।